史篤城愛揸流攤 卡城有計

猪拉多纳

威爾斯球隊卡迪夫城將於主場迎戰史篤城，卡城上周爆冷擊敗修咸頓取得救命3分，令佢哋護級仲有一線生機。而今仗卡城仲有個利好因素，就係對手史篤城早已夠分上岸，而呢班波近幾季經常喺季尾踢風流波時放軟手腳，今仗作客戰意成疑，平手盤一於支持主隊再贏一仗。

（now 621周六晚10時直播）

卡迪夫城上周作客1比0擊敗修咸頓，目前34戰得29分，表面睇形勢惡劣，但其實佢哋距離處於護級安全線嘅諾域治只係3分，由於諾域治嚟緊連場硬仗，搶分難度高，而且卡迪夫城有一場同包尾嘅新特蘭上演一場6分波生死戰，只要卡城自己夠爭氣，絕對有機會從後趕上。雖然話卡城近期聯賽主場錄得兩連敗，但對手分別係近期狀態大勇嘅水晶宮同奪標大熱門利物浦，輸波可以話係情有可原，由於今仗和都唔掂　背水一戰下可望打高一皮波。
作客數據曳到無倫

對手史篤城近年經常喺搶夠分數情況下，季尾出現揸流攤情況，例如上季最尾12輪聯賽只贏兩場、輸咗7場，前季最尾11輪則僅得1勝，依家佢哋手握43分，已經肯定護級成功，搶分決心唔及主隊。

再睇埋史篤城今季17場作客聯賽只得2勝咁大把，排全英超尾3，勝率更只得10%左右，數據差到冇朋友，嚟到季尾好難望佢哋會有改善，加上球隊心態上已經放鬆等收咧，平手盤梗係揀主隊。
領隊Chit Chat

蘇斯克查(卡迪夫城)：好多人批評我教得差，但記得當年我坐喺曼聯後備席，一出場就要證明呢班人有幾錯，依家做咗領隊我仍然保持住呢種心態。