蓄銳紅鑽明恰攰爆前鋒

猪拉多纳

日職四支亞冠盃代表下周中要進行最後一場分組賽，到時會決定能否打入淘汰賽，今周賽事夾正喺兩輪關鍵大戰中間，踢得咁密好鬼蝕底。亞冠盃代表川崎前鋒仲要大傷「鋒」，今日作客浦和紅鑽疲兵兼殘陣，惡唔出樣，紅鑽小讓平半，上盤有1.76倍捧得過！

川崎前鋒剛於周中作客險勝FC貴州1比0，貴州有兩人被逐，戰情超激。前鋒主將大久保嘉人同中村憲剛等人年過三十，不利連拚，最慘係球隊前線傷兵滿營，箭頭森島康仁、雲拿天奴及小林悠全部有傷，小林悠老婆啱啱生咗個仔，但睇怕佢都係難望落場爭取士哥慶祝喇，前線又靠大久保嘉人擔大旗，實攰死佢！

浦和紅鑽上季畀川崎前鋒食住，聯賽連日聯盃四戰一勝三負，勁冇癮！不過，射手興梠慎三去季對住川崎前鋒射入三球，成為對手剋星，家陣大軍有埋星級射手李忠成加盟，前線攻力進一步提升，有條件威番次！紅鑽剛過去周中喺聯賽盃留晒力，結果照贏魚腩德島漩渦，成班主將抖足精神，將以緊迫踢法逼死對手。
風林鯨魚鬥守吼細

同日甲府風林主場對名古屋鯨魚，風林前線得個基斯坦奴達施華識入波，佢哋深知自己鋒力不足，所以都主力做好防務，大軍聯賽連盃賽九連細，對上三場都冇士哥，擺明係守強於攻。鯨魚近三戰狂失十球，點都要重整防線，今次仲有箭頭永井謙佑坐波監，預期入波唔多，捧細。

（周六晚6時直播）