撐利物浦！撐謝拉特！

猪拉多纳

衝冠4部曲 頭關先斬諾域治

利物浦上周日勝出激動人心一仗，喺爭標超級大戰擊敗曼城，賽後隊長謝拉特激動抱頭，眼泛淚光，觸動無數球迷，利迷當然睇到眼濕濕，連非利迷都認為「謝拉特好值得攞一次英超冠軍﹗」。謝拉特為紅軍付出自己嘅一切，奮戰多年，依家距離其夢寐以求嘅英超冠軍只有4步之遙，今晚作客「金絲雀」諾域治係第1步，紅軍上下一心，決意要幫謝隊長一圓英超冠軍夢，讓球客勝捧得過！

（now 621周日晚7時直播）
獎品櫃獨欠英超獎盃

希爾斯堡慘劇25周年前夕，利物浦對曼城雖然贏得驚險，但就拿下重大勝利，並締10連勝佳績，賽後「神奇隊長」謝拉特不禁流下男兒淚，既為包括佢表哥在內喺慘劇中死去嘅96名紅軍球迷而感慨，亦為呢場得來不易嘅勝仗而激動。激動過後，謝拉特再次發揮隊長本色，激勵隊友要一齊上，對諾域治唔好輕敵，呢幾幕令無數球迷為之動容，對呢位紅軍隊長增加幾分敬意。

已贏盡所有錦標嘅謝拉特，佢嘅獎品櫃中依家只欠一面英超冠軍獎牌，雖然佢幾年前可以加盟更大球會爭逐榮譽，但佢選擇留低：「幫利物浦攞1次冠軍，爽過喺其他地方攞10次！」依家佢嘅忠誠係時候獲得一座英超冠軍獎盃作為回報，其他紅軍球員定會團結一致，為隊長、為球迷、為球會贏晒餘下嘅4場波，而今場當然要「捕雀」攞3分﹗

諾域治今個月初突然怒炒主帥曉頓，搵嚟青年軍教頭尼爾阿當頂上，但新帥上場未能開個靚局，喺護級6分波大戰輸咗畀富咸，依家佢哋嘅話級形勢相當吃緊，而今場撞正氣勢如虹嘅利物浦就整定佢哋唔好彩嘞！
阿蘇打雀入足11球

睇番近年對賽成績，「金絲雀」可以話係紅軍嘅「私房菜」，對上4次交手紅軍皆大炒3粒或以上，前鋒蘇亞雷斯更加係「打雀高手」，近4次對「金絲雀」入咗11球，對上一次更嚟一鋪大四喜，所以紅軍今場有史杜列治因傷缺陣及佐敦軒達臣停賽都冇有怕，讓球客勝可以放心捧場。