巴利仔10億身價超值

猪拉多纳

筆者良師兼老友、世界頂級評述員馬田泰拿曾經講過，做講波佬的確係幸運兒，唔使錢就有好波睇，仲要有糧出，呢啲工去邊度搵啊？今屆西班牙盃決賽好精彩，就算貼錢坐山頂睇波都值，淨係見到皇馬球星加里夫巴利嗰個奠勝球已經值回票價啦！

加里夫巴利個人跑足60碼射入呢個史無前例、可遇而不可求既士哥，成功幫球隊擊敗死敵巴塞隆拿，過程由場內波out走到場外，之後再入返場內，先後爆過幾個敵人，仲要喺死位射入對手龍門大細，咁精彩絕倫、經典非凡嘅入球，你話係咪一生難得，可遇而不可求呢？

話就話加里夫巴利身價高達10億港紙，但佢加盟只係大半季已經融入球隊，清楚理解教練嘅打法同部署，依家一有機會出場就能夠打出呢啲難得嘅高水準足球畀球迷睇，同時協助皇馬殺入最後直路仍然有機會爭冠軍，小弟就認為佢係物超所值喇！
無緣世盃一樣好睇

不過世事無絕對，佢代表嘅威爾斯國家隊無緣去巴西爭世盃，但有好亦有壞，一個咁超卓、非同凡響嘅球員有一樣嘢我地永遠都可以睇到，就係佢嘅速度！今期Peter會分享一個關於速度嘅英文金句，Speed has no slump！速度冇低潮嘅！係上天賜畀巴利，好多人都冇，但巴利仔有，大家繼續好好咁欣賞佢啦！
金句：巴利仔有三樣好，跑得快、速度高、步如飛！