曼城殘陣炒唔起

猪拉多纳

西布朗搏命搶護級救生圈

英超爭霸臨近尾聲，車路士上周六晚「跣胎」自毀長城，曼城成為最有機會威脅利物浦嘅球隊。不過，佢哋今輪主場鬥西布朗仍然缺少耶耶托尼、大衞施華同捷西斯拿華斯3大中場重心，加上兩大前鋒尼格度同阿古路齊齊死火，呢一關絕對唔易過；至於西布朗護級形勢危重，今仗作客誓會搏盡搶救命3分，讓球主客和曼城讓到「-2」似乎過咗火位，可博2.25倍讓球客勝！

（now 621周二凌晨3時直播）
中場3大主力缺陣

曼城前仗於爭標關鍵6分波不敵利物浦，其實情況未算好壞，最大鑊係佢哋上周中主場鬥新特蘭跌咗2分，教頭比歷連尼歸咎於班波輸完場大戰未能調整心情，試圖為球員開脫。無論點都好，家陣佢哋已經畀「紅軍」甩開咗，但並唔係冇得追，大前提係要自己生性贏晒餘下賽事，再望利物浦失分。

不過，曼城正面對傷兵潮，主將耶耶托尼、大衞施華同捷西斯拿華斯傷晒，令中前場組織出咗問題，替工查維加西亞有破壞冇建設，快翼捷西斯拿華斯缺陣就削弱咗側擊力，令一對箭頭冇供應。而射手阿古路同尼格度都陷入球荒，上次入波已經係今年1月，前者復出後仲未弗番，難怪球隊上場冇乜料到。
連續3場有分落袋

另一邊廂西布朗則要為護級而努力，因為榜尾新特蘭前晚爆冷贏車仔，而卡迪夫城打和史篤城亦有1分進帳，間接令整個護級形勢湧現更多變數，西布朗一日未攬實救生圈，隨時會被拖番落水。

好在西布朗近況唔錯，對上3場都有分落袋，上場鬥熱刺用咗31分鐘就攻入3粒，雖然最後畀人追番跌番兩分，但已反映球隊唔係冇反抗能力，特別係隊內攻擊重心馬迪維達、施斯隆同艾馬菲達奴都好弗，今仗面對後防不穩嘅曼城唔係冇機會偷雞，2.25倍讓球客勝博得過！
領隊Chit Chat

比歷連尼(曼城)：我早就話過對護級球隊唔易踢，上仗新特蘭真係打得好好，季尾遇上呢類球隊真係好難搞，因為佢哋球球波都去到盡。

梅爾(西布朗)：喺足球世界冇球隊係贏梗，新特蘭上次喺曼城身上搶到分係一個啟示，我哋今次都有機會做同樣嘅嘢，我哋目標係3分。