西布朗焗攻曼城「大」開殺戒

猪拉多纳

英超今晚上演獨腳戲，由曼城主場恭候西布朗，照秤就梗係冇得打啦，但睇見包艇嘅新特蘭最近連環喺曼城同車路士身上搶分得手，就證明護級分子癲起上嚟係幾咁惡。西布朗近期係咁入波，造訪主場「火力王」曼城實大把士哥，入球大細中位數開到3.5球，照捧1.85倍大！

（now621台周二凌晨3:00直播）

季尾波最講鬥志，西布朗家陣得33分喺手，仲未完全解除降班威脅，領隊梅爾賽前就話，希望班球員向新特蘭借鏡：「和完曼城再贏車路士，負面啲睇，我哋嘅護級對手係搶到分，但如果正面啲去諗，呢兩場戰果可以帶出一個訊息，就係足球場上乜都有可能發生，既然新特蘭做到，點解我哋唔得？」聽梅爾咁講，今鋪去到曼城地頭唔似會龜縮喎。
大衞施華傷愈候命

「黑貓」呢期係威，但查實西布朗都唔嘢少，最近3場聯賽都搶到分，當中艾馬菲達奴、馬迪維達同施斯隆近5仗合力包辦咗5個入波，配合後上王布拉特，對住近4場聯賽場場有失波嘅曼城，要入波唔係冇機。之不過咁，西布朗最近同卡迪夫城、熱刺交手，都喺領先情況下被逼和3:3完場，一來證明呢班波防守曳，二來反映佢哋踏入比賽尾段似乎唔夠集中。

作為曼城呢啲主攻型球隊，最驚就係對手唔攻啫，西布朗為咗搶分唔慌踢得保守，咁就啱晒曼城胃口喇！

事實上，隨住上場聯賽失分畀新特蘭，「藍月亮」嘅爭標夢幾近幻滅，英國《每日郵報》透露，領隊比歷連尼下個月就會同行政總監蘇利安奴、體育總監碧格列斯坦開會，研究點解隊波會「臨尾香」。

照肺在即，比帥好好睇睇都要做番齣好戲交差，佢老人家賽前收到好消息，就係中場大衞施華克服足踝傷可以候命，由佢同拿斯尼餵波畀阿古路，邊使慌冇波入吖，淨係睇「藍月亮」今季英超主場平均有超過3球進帳，就知曼城為爭標，今晚肯定會「大」開殺戒！
Data King：阿古路專恰西布朗

‧阿古路對上4次英超鬥西布朗共入4球。

‧自2012年12月開始，曼城未試過連續兩場英超主場失分。

‧今仗係西布朗英超第300戰。
乜都玩錦囊：玩埋「藍月亮」「主主」

曼城近期嘅表現無疑係令人失望，但佢哋自從2012年尾開始，從未試過連續兩場英超主場失分，考慮到西布朗防線咁唔穩陣，「藍月亮」有望由頭贏到尾，1.52倍主主要兼顧。