四隊同分Ｇ組晉級大亂鬥

猪拉多纳

亞冠盃踢到最後一輪分組賽，G組四隊同得七分鬥得超激，全北汽車主場迎戰墨爾本勝利，廣州恒大（馬會譯名：ＦＣ廣州）主場對橫濱水手，全北同恒大和波就可出線，但兩隊同係主場出擊，唔會求和晉級咁衰仔，今輪一樣會照攻，預期兩場都係多士哥，要晒入球大！

G組亂過亂世佳人，連亞洲足協都一度搞錯排名誤將全北汽車擺喺首位，真係超緊湊！喺度先交代吓形勢，恒大同全北汽車佔上風，假設兩場和晒，佢哋會攜手晉級，而計對賽恒大贏全北，兩軍若齊齊贏波，恒大將首名晉級。墨爾本勝利同橫濱水手就唔使諗咁多，一定要贏先可以殺入淘汰賽。

全北汽車牌面着數好多，但教頭崔康熙一向寸咀，今場賽前話明唔會為和波而戰：「呢組鬥得好激，我哋最後一輪主場出戰，目標梗係贏波殺入十六強啦！」全北本身擅攻不擅守，勉強縮後求和盞搞，佢哋分組賽五戰四場開大，呢次同背城借一嘅墨爾本勝利鬥攻，相信入波唔會少，大盤值得留意。

（now 670周二晚7時直播）
迪亞文迪復出恒大火力猛

至於同時間恒大主場對橫濱水手一戰，恒大隊長鄭智有傷唔踢得，小將廖力生要坐波監，中場調動空間唔多，好在進攻主力迪亞文迪傷愈，穆里奇亦可候命，前線保持強大火力。恒大老細許家印早前設宴激勵士氣，全軍都以贏波出線為目標，唔存在求和晉級嘅諗法，一定會同水手死過，呢場預期都係多士哥，可捧大盤。