貴州不和作客難擋流浪者

猪拉多纳

亞冠盃H組賽事，另一支中超代表貴州人和（馬會譯名：FC貴州）作客澳職球隊西悉尼流浪者，FC貴州篤定出局之餘，仲有三位主將孫繼海、米斯莫域及張成林停賽，最大鑊係教練宮磊被架空，今仗遠征澳洲僅靠副選出戰，球隊內部立立亂，擺明放棄呢場例行公事。流浪者和波就出線，但為爭組首名，仍會以3分為目標，直取讓球主勝。

（now 671周二晚6時直播）

FC貴州上輪聯賽對FC河南，唔見宮磊身影，由技術總監朱炯及領隊楊晨暫掌球隊，據悉由於球星孫繼海不滿教練團表現，迫使會方做出有關變動。宮磊今仗可謂被「放逐」去澳洲，因為只係帶領二線兵比賽，其餘主力留喺中國備戰聯賽，將帥都無心戀戰，大敗好正路。

西悉尼流浪者今屆亞冠盃演出有驚喜，上輪作客贈南韓勁旅蔚山現代兩蛋，充滿霸氣。中場球星小野伸二將於6月轉投札幌岡薩多，當然希望喺最後日子做齣好戲。今仗一於攞「貴州B隊」祭旗，為周末季後賽4強對中岸水手壯行色。
日韓「大」戰爭出線

同組同時進行日韓大戰，川崎前鋒主場對蔚山現代，主隊和波都可以出線，現代必須贏波先至能夠晉級，作客都會豁出去一搏。不過現代近況差，隨時前面入埋，唔夠後面輸，寧願揀入球大。