車仔硬淨唔驚馬體會

猪拉多纳

寸王經驗贏晒冇有怕

歐聯準決賽今晚展開首回合廝殺，4強中唯一未拎過冠軍嘅馬德里體育會，會喺主場迎戰車路士。馬體會今季異軍突起贏盡掌聲，不過嚟到爭入決賽嘅關鍵時刻，阿占認為主帥功力會成為勝負分野。「寸王」莫連奴嘅豐富經驗絕對比施蒙尼值得信賴，「藍戰士」夠晒硬淨，今場受讓平半一於捧下盤！

（有線61、64、201及203、中央5台周三凌晨2:45直播）

馬體會今季可以喺西甲壓住皇馬同巴塞兩大班霸，實力當然唔講得笑，除咗迪亞高哥斯達呢位超級射手外，佐治高基、阿達杜倫等好波之人都有好大貢獻，不過阿達杜倫近期受傷患困擾，今場雖然話已經傷愈，但狀態點都打折扣，九成先做後備。教練施蒙尼嘅機動性戰術相當出色，不過佢哋歐聯經驗始終較淺，上輪對住熟晒路嘅巴塞當然踢出最佳水準，不過今次面對英超頂尖勁旅車路士，無論風格同戰術都好唔同，絕對係一大考驗。
馬體會阿達杜倫啱啱好番做後備

相比之下，「藍戰士」領隊莫連奴以往帶波圖同國際米蘭都拎過歐聯冠軍，帶皇馬同車路士亦年年打入最後階段，咩時候用咩戰術已經駕輕就熟，上一輪對巴黎聖日耳門「絕殺」後唔慶祝走去畀指示球員，足見佢嘅冷靜同功架，由於夏薩特都傷埋，今場作客車仔相信會穩陣為先，想求不敗唔係難事。
車仔斟哥斯達擾軍心

英國傳媒賽前仲吹到好勁，話車仔今夏會用5,000萬鎊簽迪亞高哥斯達，因為唔想喺傾轉會搞衰兩隊關係，所以先容許馬體會門將泰拔高圖爾斯以借將身份倒戈上陣，就連施蒙尼都話如果迪亞高哥斯達想走唔會阻佢，大戰前先嚟傳出呢啲新聞擾亂軍心，今場都係撐車仔穩陣。
Data King：馬體會鬥英格蘭波冇優勢

‧馬體會21次同英格蘭球會交手，共錄8勝8和5負。

‧馬體會連開5口入球細。

‧馬體會連續5仗主場保持清白身。

‧車路士作客西甲球隊共取得3勝6和5負。
乜都玩錦囊：歐戰4強鬥保守捧入球細

嚟到歐聯4強階段，相信兩軍都會加倍謹慎應戰，而且雙方主帥已經喺西甲交手多次，熟悉彼此打法，未必咁易可以撕破對方防線。睇埋馬體會連續4場零封對手，車仔近4仗亦有3場保持清白身，既然兩軍防守咁硬淨，1.5倍入球細熱都要捧。
頂占筍盤：車路士（下盤）