世界漫遊：必利是錦標有瞄頭

不死鸟

一場原本已成絕唱嘅雌雄大戰，隨住新馬后高價易主，帶嚟新變數。應屆美國肯塔基橡樹賽冠軍Rachel Alexandra，早幾日覓得新主人，美國馬王「機靈駿馬」馬主Jess Jackson，以名下嘅Stonestreet Stable，聯同Harold T.McCormick攜手買入呢匹北美馬壇超新星。

　　Jess Jackson響新聞稿公布呢項驚人交易，但冇提到銀碼，據知Rachel Alexandra將會轉交艾謀信訓練，退役後會運往Lane's End Farm，跟「機靈駿馬」呢匹兩屆美國馬王配種。至於鞍上配搭亦告落實，布利萊將繼續執掌帥印，而且仲簽夠一年，呢個決定打破咗多項紀錄，其中最矚目就係布利萊成為史上第一位贏完打吡後，即時響次關必利是錦標選騎他駒倒戈相向嘅騎者。

　　Rachel Alexandra可唔可以如願出戰三冠次關，機會只係五五波，因為呢匹橡樹冠軍最初冇報名三冠三關賽事，而暫時出戰馬匹剛好滿額，日前官方作出澄清，若最後報名馬多過上限嘅十四匹，已報跑三冠系列嘅馬有優先出賽權，換言之就算Rachel Alexandra獎金夠高，新馬主肯付十萬蚊過期罰款，但只要再多一匹早已報跑三冠嘅賽駒報名，咁呢匹馬就即時列為後備，所以呢場萬眾期待嘅大戰能唔能夠成事，就要望天打卦。