聖日耳門大起伊維恩

猪拉多纳

卡雲尼爆發 火力有保證

今晚法甲上演兩場第34輪補賽，剛贏得法國聯賽盃冠軍嘅巴黎聖日耳門主場迎戰下游球隊伊維恩穩袋三分，首選大盤。另一場圖盧茲主場鬥里昂，里昂近年作客圖盧茲例牌冇運行，加上剛於決賽落敗，士氣、信心均受挫，平手盤捧圖盧茲。

為遷就聖日耳門、里昂於上周末角逐法國聯賽盃，雙方第34輪聯賽延遲至今晚舉行。由於摩納哥剛過去周日主場小勝尼斯，聯賽累積三連勝，聖日耳門目前於榜首只有七分領先優勢，積分上仲未肯定捧盃，仍需全力求勝。烏拉圭射手卡雲尼喺上場法聯盃決賽個人梅開二度，證明咗有足夠實力代替受傷缺陣嘅伊巴謙莫域，配合其餘幾名南美兵包括拿維斯、柏斯托尼、盧卡斯洛迪古斯等等，攻力依然有保證。另一邊廂嘅伊維恩現排聯賽榜十六位，領先尾三嘅索察五分，仍需搶分護級，佢哋對上五場作客都有士哥，證明唔會因為作客而變得踢法保守。今場如果捧主隊贏兩球開讓球主勝只得1.56倍唔抵玩，不如改捧1.72倍大盤仲划算。

（TVB 301周四凌晨零時30分直播）
圖盧茲主場恰到里昂

另一場圖盧茲主場鬥里昂，單睇積分表，圖盧茲排第九比上不足、比下有餘，戰意或比不上要爭歐洲賽資格嘅里昂，不過里昂剛剛搏完法聯盃決賽，體力上肯定比養精蓄銳嘅主隊輸蝕。而且里昂過去六次作客圖盧茲未嘗一勝，只得兩和四負成績，今次疲兵出征想打破宿命唔容易，平手盤波童捧主隊。

（TVB 302周四凌晨零時30分直播）