浦項制鐵鬆章畀里

猪拉多纳

出咗線趁機玩中日死敵

亞冠盃E組一哥浦項制鐵肯定首名出線，其餘三隊同得五分打甩髀。浦項制鐵最後一輪主場對泰國大軍武里南聯，呢場對主隊嚟講只係例行公事，但呢支南韓球隊隨時玩嘢讓路畀武里南聯，趁機踢走兩支中、日球隊，今場讓波信唔過，博讓球客勝！

（now 671及672周三晚7時直播）

浦項制鐵篤定係E組首名，剩番一個出線席位，由大阪櫻花、山東魯能（馬會譯名：FC山東）同武里南聯爭，三隊同樣得五分，形勢非常微妙，櫻花今輪贏波就肯定打入16強，若然兩場和晒，櫻花都可晉級。而魯能上輪不敵武里南聯，對賽往績輸蝕，若然兩隊雙雙贏波，晉級嘅都會係武里南聯，所以魯能亦無退路。

武里南聯最着數係今仗對住出咗線嘅浦項制鐵，南韓球會不嬲都視日本球會為死敵，而中超球會近年不斷撬走韓職球隊主將，當地球壇都唔多妥呢班暴發戶，呢次浦項制鐵無論贏輸都係首名出線，冇必要精銳盡出搏殺，武里南聯隨時偷雞成功，受讓抵玩。
山東櫻花神鋒演入球騷

至於同組另一場山東魯能主場對大阪櫻花，兩隊各有一位超級射手，魯能巴西射手路夫停賽期滿復出，佢上場喺聯賽作客FC北京連中三元，成為中超史上首位作客北京「戴帽」嘅球員，狀態勁弗！櫻花亦有烏拉圭星級射手科蘭在陣，兩隊為出線唔會保留必定鬥攻，玩入球大有着數。