皇馬拜仁巔峰大戰

猪拉多纳

歐洲第一打吡 3箭對3箭

歐聯準決賽首回合上演巔峰大戰，皇家馬德里主場對拜仁慕尼黑，數歐聯歷史，過去AC米蘭同巴塞隆拿曾經15度交鋒，係交鋒次數最多兩隊，故兩軍交鋒號稱為歐洲第一打吡。不過嚟到今日，歐洲第一打吡雙雄已經易主，皆因今場係皇馬同拜仁喺歐聯嘅第15次對壘，而且兩軍仲有下周中次回合賽事，對賽次數肯定超越AC同巴塞。今仗兩軍旗鼓相當，觀賞價值高於菠菜價值，基於雙方不約而同排出三箭頭對撼，以攻代守，求穩陣可取1.62倍入球大，要好分頭可博3.4倍和波。

（有線61及64台周四凌晨2時45分直播）

皇馬啱啱擊敗宿敵巴塞隆拿捧走西班牙盃，大營氣氛當然好，今仗仲有王牌前鋒基斯坦奴朗拿度傷愈復出，前線上齊彈藥同衞冕嘅拜仁死過，皇馬前年至喺準決賽互射12碼輸畀拜仁，今仗復仇意欲極強，事實上確有足夠理由支持佢哋對今仗樂觀，皇馬喺歐聯主場賽事已保持17場不敗（15勝2和），安察洛堤執教生涯亦從未輸過畀拜仁（帶領AC米蘭6戰拜仁4勝2和），球隊喺今屆歐聯已先後淘汰德甲三哥史浩克04同二哥多蒙特，主場更分別取得6比1同3比0大勝。
C朗復出挑戰入球新紀錄

今場C朗復出，只要取得入球即可以15球刷新歐聯個人單季入球紀錄，射手賓施馬同近期弗到震嘅加里夫巴利，呢個昂貴三叉戟組合勢必喺巴拿貝繼續爆發。

不過，皇馬向來攻優於守，之前面對史浩克同多蒙特都共失4球，喺西甲對強隊失波亦多，今仗主場主動出擊，防線會露出更多空位，面對上屆冠軍幾難唔失波。
拜仁變陣洛賓列貝利移前

拜仁係上屆冠軍，亦係新地上最強，過去對皇馬往績亦佔先，歷來20次交手，取得11勝2和7負佳績，話安察洛堤對拜仁往績醒，但拜仁教練哥迪奧拿亦係皇馬剋星，喺佢帶領巴塞期間，15次對皇馬取得9勝4和2負佳績。拜仁近期演出同戰績稍見滑落，但主要原因同佢哋喺德甲已經提早奪標有關，今仗作客巴拿貝戰意唔同講法，根據多家德國傳媒報道，哥帥今仗將會變陣出擊，陣式由原來嘅4231同4141改為4123，將一雙魔翼洛賓同列貝利移前，進一步威脅皇馬不穩防線。今場對攻格局，入波唔會少，而且唔易分出勝負，可以兼顧和波。
Player Browser：卡斯拿斯

卡斯拿斯今季雖於聯賽長期屈居於迪亞高洛迪古斯之後，但身手其實沒有生疏，反而於歐聯賽事和西班牙盃交出高水準的表現，係皇馬早前贏得西班牙盃冠軍及於歐聯打入四強階段的最大功臣，今仗縱然面對拜仁的強攻，相信以卡斯拿斯的身手，都會變成其表演的機會。
紐亞

紐亞今季於拜仁長居正選，表現穩健，係球隊能夠提早贏得德甲冠軍的功臣。紐亞今季代表拜仁於歐聯上陣，亦鮮有出現重大的失誤，今仗雖然有機會會遇上傷愈復出的C朗拿度及近況不錯的賓施馬，但以紐亞今季上佳的演出，相信可力拒對手的來犯。
歐聯密碼

05:兩軍對上5次於歐聯交手均由主場一方勝出，5次勝負差距均為一球，從未出現兩球以或上

14:C朗今屆歐聯射入14球，已追平美斯一屆賽事入球最多紀錄，只要再入球便可刷新紀錄

32:皇馬係今屆攻力最強球隊，分組賽連淘汰賽10戰共入32球，平均每場入3.2球

36:C朗係今屆歐聯射門中目標次數最多嘅球員，共36次

128:拜仁係今屆射門中目標次數最多嘅球隊，共128次