高手過招換邊後先埋牙

猪拉多纳

今屆歐聯兩場4強，球迷應該比較重視皇馬大戰拜仁慕尼黑，除咗兩隊球星如雲，亦因為雙方崇尚進攻足球，欣賞指數極高。兩大豪門勢均力敵，首回合度士睇好皇馬些少，畢竟主場出擊，一定要把握地利，希望取得領先優勢，否則次回合作客將會極之難踢。不過拜仁如日中天，要贏佢哋談何容易，估計皇馬上半場佔唔到甜頭，或要戰至最後先至驚險小勝，高手過招勝負難料，可以考慮半場和。

以波講波，度士比較鍾意皇馬，球隊行軍速度快，進攻線上嘅C朗、加里夫巴利、迪馬利亞嘅閃電反擊，令人賞心悅目。雖然話C朗近期受傷患困擾，缺席幾場比賽，但估計係安察洛堤有心畀佢休息，留待今場大戰搏殺。而且來到呢種頂級對決，每位落得場嘅球員都會付出百分之二百努力，盡力一搏，就算C朗有傷影響發揮，隊友們都可以一人走多一步搭夠。
最怕「輸壞個頭」

拜仁慕尼黑近年不斷進步，最大優勢係已建立一個固定班底多時，球員之間夾慣夾熟，整體戰威力強大。不過拜仁踏入歐聯淘汰賽後，表現唔算標青，對住曼聯，都顯得有啲狼狽。講到尾來到淘汰賽，稍有不慎隨時出局，表現稍為保守，可以理解。拜仁作客遇上攻力強大嘅皇馬 會先求企穩陣，以免輸壞個頭，上半場唔會太進取，等換邊後再真正埋牙。