PSG讓主有作為

猪拉多纳

伊維恩鋒力超弱雞

啱啱勇奪法聯盃冠軍嘅巴黎聖日耳門（PSG），今晚重返法甲戰線迎戰伊維恩，憑藉「無敵主場」嘅優勢，即使缺少箭頭伊巴謙莫域都唔成問題，PSG讓一球，放心捧1.56倍「讓球主勝」。

（TVB301周四凌晨0:30直播）
卡雲尼狀態勁Fit

PSG喺歐聯8強被車路士淘汰後，緊接喺聯賽再輸畀里昂，好彩佢哋極速重拾狀態，星期日喺法聯盃決賽鬥里昂，靠箭頭卡雲尼梅開二度奠勝，成功復仇摘桂。雖然今場有防守中場莫達停賽，箭頭伊巴謙莫域又拉傷大腿肌肉出唔到，不過板櫈夠厚嘅佢哋，前線卡雲尼同拿維斯同樣把握力強，中場卡比耶、馬度迪、馬高華拉堤等件件都極高質素。

更何況佢哋個主場硬淨到爆，今季踢咗16場聯賽13勝3和未輸過，近6場更加攻入17球而不失一球，當中連聖伊天同馬賽呢啲前列分子都咬唔入佢哋，今場對手換成全法甲作客進攻火力第二弱嘅伊維恩，要熱食「讓主」話咁易啦！