賓菲加 祖記防線「細」紀戰

猪拉多纳

歐聯大戰當然精彩啦，但歐霸盃戲碼都唔弱o架，今晚4強首回合就有上屆亞軍兼賓菲加，主場大戰意甲「準冠軍」祖雲達斯喇！主隊雖然挾住新科葡超冠軍之名強勢進擊，不過「斑馬兵團」近況同樣極佳，佢哋為咗打入決賽、喺自己地頭一搔17年歐戰錦標之癢，今晚作客唔會咁易認輸，況且兩軍嘅後防同樣出色，今晚隨時合演「後防大戰」，入波唔慌多，一於力撐1.59倍入球細啦！

（有線61、64、201及203、廣東體育周五凌晨3:05直播）

祖記對上一次奪得歐洲賽錦標，已經要追溯至1997年嘅歐洲超級盃，呢支昔日嘅歐洲巨人隨後更因為「電話門」假波醜聞一沉不起，家陣打入歐霸4強，當然要盡地一煲務求奪得錦標啦！祖記中場馬治斯奧都話一諗到隻獎盃就充滿力量，但係佢哋今仗作客要贏波絕對唔易，皆因祖雲達斯今季火力唔強，每場入波都只係一粒起、兩粒止，今場作客後防標青嘅賓菲加，想話為所欲為？好難咯！
「斑馬兵團」硬淨6場歐霸僅失兩球

不過掉番轉睇，「斑馬兵團」同樣唔易食，憑住基亞連尼、奧邦拿等守將嘅出色表現，加埋門神保方「保住後方」，佢哋喺今屆6場歐霸盃賽事入面只係失過兩球咁大把，賓菲加想好似對住聯賽對手咁入番佢哋幾粒贏波，並唔係易事嚟o架。

賓菲加啱啱踢出一段7連勝嘅走勢，順利重奪失落3季嘅葡超聯賽冠軍，其實佢哋今季嘅強勢最大因素係後防非常穩陣，全季聯賽28場賽事僅失15粒，近7場更只係失咗1球，由雷沙奧同加雷帶領嘅防線有力頂住唔算太強嘅祖雲達斯鋒線。

不過論整體實力，「斑馬兵團」肯定遠超葡超球隊，加埋賓菲加今場有攻擊重心之一嘅翼鋒伊度亞度沙維奧養傷，自斷一臂，無疑令主隊爭取入球更添難度，今場「防線對壘」真係咪使旨意開入球騷喇！
乜都玩錦囊：半場主勝博得過

兩軍無論近況定後防水平都非常相似，難以揀出一隊秤先。不過值得留意嘅係賓菲加靠住主場威力，近7戰有5次都喺半場領先，反之，相對慢熱嘅祖雲達斯近8場則有5次未能喺半場取得優勢，火力較強嘅賓菲加仍值得投以信任一票，3.25倍半場主勝博得過。
Data King：賓菲加對意球隊往績輸蝕

‧賓菲加過往27次鬥意大利球隊，共得8勝4和15負。

‧今屆歐霸盃僅得賓菲加及祖雲達斯未嘗落敗。

‧賓菲加近12次主場歐洲賽事都冇輸過，獲10勝2和。