西維爾火力猛「蝙蝠」有難

猪拉多纳

西維爾近期主場好似着晒火咁，對住咩球隊都好似當人冇到話炒就炒。佢哋周五凌晨會喺主場同華倫西亞上演歐霸盃4強首回合大戰，仲唔利用主場威力取得優勢咩？西維爾今場讓半一，2.08倍上盤博得過，一於撐主隊响呢場「西甲打吡」大炒「作客蟲」華倫！

（有線62及202周五凌晨3:05直播）
加美路4場入6球

西維爾季尾走勢強勁，尤其係主場，已經連贏5場，就算係皇家馬德里去到，都要輸波敗興而歸。佢哋歐霸8強對住葡超勁旅波圖，首回合作客輸0:1，但係返到主場即時嚟料，大炒對手4:1，反勝晉級，認真犀利。

主隊今場雖然有守將安度查停賽，艾拔圖摩蘭奴又養傷缺陣，但係前線有加美路同卡路士巴卡兩位射手坐鎮，已經足以嚇到華倫唔敢攻。當中加美路近4場入6球，華倫後防今場絕對有排受。

至於華倫作客真係好曳，近5場客場都冇贏過，表現完全同主場係兩個樣。佢哋上一輪對住巴素利首回合作客已經以0:3大敗，又係返到主場先跌跌撞撞進身4強。加埋「蝙蝠軍團」仲要有後衞列卡度哥斯達、龍門迪亞高艾維斯唔出得，今場對住西維爾，首回合睇嚟都係凍過水，等次回合返主場再諗計啦。