三箭破壞力強細頂鹿角

猪拉多纳

廣島三箭能夠連續兩季稱霸日職，贏在紀律夠好，打大戰例必付出120努力人人走多步，大軍剛於亞冠盃突破分組賽，今輪返聯賽硬撼實力分子鹿島鹿角，將會繼續以高效踢法同對手周旋，預期戰況緊湊而未必會有好多士哥，博細盤！

蘇豪上年去廣島三箭探營，印象最深刻係教頭森保一勁謙虛，佢早就講過球會資源有限，唔可以好似財雄勢大嘅浦和紅鑽燒錢買人，今季三箭又畀紅鑽撬走門神西川周作，但班波根基穩固，唔會因為個別主力離隊就散晒。而球會青訓搞得好，好似野津田岳人呢類小將受到重用，已經可以出得大場面。

廣島三箭不嬲畀人嘅感覺係士氣好好，又係要讚森保一，佢係球會名宿，唔少球員都視佢為偶像，自然肯為球會賣命。三箭剛於亞冠盃生死戰1比0小勝中岸水手，佢哋每逢大戰都會加強壓迫，未必打得好悅目，但至少可破壞對手組織，再把握反擊機會爭取入波，呢次惡戰爭標大敵鹿角都會用返呢種打法。
近六戰鹿角五開細

鹿島鹿角開季頭段係威係勢，但近兩場聯賽主場出擊輸晒，兩戰加埋失五粒，後防演出明顯走樣。鹿角近六次作客三箭僅一勝，六場波只係入三球，其中五場開細，反映佢哋對住三箭經常老鼠拉龜，今次都係冇乜優勢，預期今場入波唔多，要細盤。
有線61及201台周六晚6時直播