愛華頓瘋搶歐聯席位客窒聖人

猪拉多纳

今季英超只係剩低3輪比賽，除咗冠軍爭逐有睇頭外，第4位嘅競爭情況同樣激烈，「拖肥糖」愛華頓暫時同「四哥」阿仙奴相差1分，嚟緊每一場比賽都不容有失，今晚愛華頓作客「聖人」修咸頓，單係戰意已經遠勝冇乜好爭嘅修咸頓，領隊馬天尼斯賽前仲落「全勝入歐聯」指令，心水推介愛華頓客勝！

愛華頓季前冇咗領隊莫耶斯，不過搵到馬天尼斯領軍實力反而更加強勁，依家仍然好有機會殺入前4取得歐聯資格，馬天尼斯賽前就講明，餘下3仗全勝嘅話應該可以完成任務，上場輕取曼聯2:0直接送莫耶斯落台，證明愛華頓實力強勁，出戰歐聯都絕對唔會失禮囉。

雖然比利時前鋒米拿拉斯鼠蹊肌肉撕裂提早收咧，不過愛華頓仲有盧卡古、巴克里、同賴史密夫呢啲攻擊好手，加埋左閘巴尼斯都有強大攻擊力，佢哋近7場比賽合共轟入11球，足以彌補米拿拉斯缺陣嘅損失，相信今晚「拖肥糖」會乘住贏曼聯個勢，再攞一場勝仗！
馬天尼斯落order要全勝

論爭勝心，主隊修咸頓一定唔及得上客隊，「聖人」依家暫時得49分排第8位，爭歐洲賽冇行，降班又輪唔到佢哋，再加上修咸頓近況認真麻麻，對上3場比賽未贏過。雖然今晚有地利，但佢哋今季主場成績亦唔見得標青，只係有7場勝仗，所以今晚睇好愛華頓，一於捧「拖肥糖」客勝！