阿積士衝冠不勝無歸

猪拉多纳

荷甲今晚上演尾二輪聯賽，九場比賽同時間開波；榜首阿積士現時領先次席飛燕諾六分，今場作客只要打和荷華高斯，便毋須理會其他戰果完成四連霸偉業，球隊剛於荷蘭盃決賽經歷恥辱性慘敗谷埋一肚氣，預料唔會甘於和局，荷華高斯技遜一籌，主場出擊都冇着數，波童簡單捧1.51倍客W。

（now 670及672周日晚8時30分直播）

阿積士上周於荷蘭盃決賽以一比五不敵施禾利，可以講係近年國內比賽爆出嘅最大冷門，尤其阿積士喺先開紀錄嘅情況下，未夠半場已經輸番四粒，無論比賽過程及最終比分都令球迷大跌眼鏡。其實嗰場比賽阿積士係有多少輕敵，當球隊領先、然後被追和再落後，球員完全冇改變過踢法，獨沽一味走上前搶攻，施禾利嘅反擊戰術又罕有地有效，搞到阿積士愈輸愈冇信心招致大敗。

既然冇咗荷蘭盃，聯賽錦標更加不容有失，雖然佢哋今場和波已夠分捧盃，但吸取去仗教訓，相信亦唔敢再輕敵。論整體實力，阿積士肯定遠勝荷華高斯，加上後者季尾護級壓力不大，戰意有所鬆懈，聯賽已經累積三連敗，今次面對志切爭標嘅阿積士恐被祭旗。
施禾利風流波益PSV

至於啱啱贏得創會103年以來首個錦標嘅施禾利，餘下兩輪聯賽已成例行公事，主場面對仲有機會爭入前四、從而直接進身來屆歐霸盃嘅燕豪芬（PSV），1.56倍客W捧得過。