車仔主場真係秤高啲

猪拉多纳

歐聯4強戰兩場都係最佳、最好嘅戲碼，雲集當今歐洲球壇最犀利嘅一等一勁旅，有名牌嘅皇家馬德里，最有娛樂性嘅拜仁慕尼黑，仲有踢法同樣硬橋硬馬嘅車路士同馬體會列陣，呢兩隊都係打同一家波，首回合未分高下，今次碰頭仍然係戰果難料，令人充滿期待。

當今世界球壇有兩隊波反擊最犀利，昨日出場嘅皇馬勁在個人能力高，一腳波就可以搞掂你，而車路士就叻在紀律一流，中場壓迫強，一搶到波就會成班湧上去反擊。佢哋首回合去馬體會一心求和，最終求仁得仁，而上場聯賽作客利物浦查實贏得有啲運，但都要守得好先有得贏，顯示班波紀律冇得頂！
紀律性強擅打大波

今次去到歐聯4強次回合決戰，車路士初盤主場讓平半尚算合理，大家仲記唔記得佢哋上一圈點樣踢走巴黎聖日耳門先？教頭莫連奴就係部署好喺主場大反擊，嗰場勝利足以反映呢隊波打大戰有幾強，呢次佢哋喺史丹福橋抱住必勝決心搏殺，照秤真係高啲，呢場肥叔睇好上盤。