預咗加時12碼冇覺好瞓

猪拉多纳

今晚第2場歐聯4強次回合，車路士主場再鬥馬德里體育會，今場對賽雙方各有可取之處，車路士球員勝在大賽經驗豐富，主帥莫連奴更係當今球壇最出色嘅領隊之一；馬體會則好在走勢強勁，除咗上圈踢走強敵巴塞隆拿，現時更於西甲力壓皇馬同巴塞，高踞榜首冠軍在望，足以證明佢哋係真材實料，捱眼瞓嘅球迷可能要做好心理準備今晚隨時冇覺好瞓，因為度士覺得呢場波隨時要踢到加時、甚至互射埋12碼先至可以分出勝負。

車仔士首回合作客馬體會一心死守，賽後被傳媒稱為使用「大巴戰術」，其實上場聯賽對利物浦佢哋都係主守，如果唔係對方隊長謝拉特完半場前犯錯，車仔未必可以全取3分。車仔前線缺乏可靠射手係人都知，今場到底要主攻、抑或先繼續做好防守然後至伺機爭勝，真係好考莫帥功力，因為馬體會亦係一支擅長用壓迫性踢法、務求令到對手犯錯嘅反擊型球隊，一旦被對手偷雞取得作客入球，車仔形勢將會更加惡劣，想重演上圈淘汰巴黎聖日耳門嘅奇迹實在唔容易。
馬體會似當年車仔

馬體會喺施蒙尼帶領下，今年正式進入收成期，佢哋近期表現其實有當年莫連奴帶領全盛時期嘅車仔嘅影子，贏波經常一球起、兩球止，過程唔算好漂亮，但勝在夠實際，佢哋對上11場比賽有9場保持清白之身，防守甚少出現重大失誤，去到史丹福橋，雖然話係作客，但晉級機會絕對唔輸蝕。