車仔架細大巴塞死馬體會

猪拉多纳

車路士今晚喺史丹福橋迎戰馬德里體育會，上演另一場歐聯4強次回合大戰。首回合「藍戰士」領隊莫連奴「泊咗大巴喺門口」，成功守和完場，今晚次回合車仔仲有泰利喪操博復出，作客嘅馬體會亦防守耍家，1.48倍入球細熱都要捧！

（有線61、64及201、中央5台周四凌晨2:45直播）

原來馬體會今季喺西甲已經靠頭槌入咗16球，不過張峰就唔認為今晚佢哋會有乜優勢，你睇首回合馬體會射門多達19次，但真正威脅車路士嘅寥寥可數就知啦！況且因足踝受傷原本以為無緣次回合嘅泰利，連日嚟喪操5粒鐘，今晚好有機會同傷愈嘅鋒將夏薩特齊齊復出，對於有林柏特同米基爾兩位中場停賽嘅「藍戰士」嚟講，呢個消息好振奮軍心。
每日喪操5粒鐘泰利博復出

雖然傳過門將施治宣布提早收咧，但佢呢兩日同伊度奧一齊復操，《天空體育》話佢有可能踢得，況且年近40嘅舒華沙近兩場表現絕對合格有餘，配合加利卡希爾同伊雲洛域齊齊鎮守後防，「藍戰士」架「架勢大巴」依然信得過。

可能知道唔易入車仔波，馬體會射手迪亞高哥斯達賽前就出口術，話「藍戰士」如果想晉級，今仗要多啲搶攻先得喎！查實唔單止車仔防守勁，馬體會亦都一樣，佢哋防守力冠絕西甲之餘，今屆歐聯5場作客比賽亦只失咗3球咁大把。
馬體會加比停賽堤亞高夠料頂上

門將泰拔高圖爾斯今季表現愈嚟愈成熟，高甸同祖奧米蘭達亦默契十足，難怪失波咁少啦，就算今場加比要停賽，堤亞高文迪斯亦夠晒料頂佢個位，中後場一樣硬淨。既然大家都咁守得，今晚要踢到加時再分勝負絕對唔奇，開細就更加大機會啦！
Data King：馬體會勁旺「半細」

‧車路士今屆歐聯5次主場全開「半勝」。

‧馬體會近11場賽事開出10次「半細」。

‧車路士歐聯連開5口「入球雙」。
乜都玩錦囊：車仔主場靚績吼半勝

車仔日前憑住出色防守作客擊敗利物浦，今晚返到史丹福橋球場，主帥莫連奴肯定想重施故技，加上佢哋喺主場出戰今屆歐聯開晒「半勝」嘅靚績，一於吼實車仔1.82倍「第一隊入球」同埋2.95倍嘅「半勝」。