明尼路啞火捱細界

猪拉多纳

細哨冇料到惡唔出樣

南美自由盃十六強次回合壓軸戰，巴西球隊明尼路主場對哥倫比亞代表國民體育會，上屆冠軍明尼路近況欠佳，尤其係鋒線死晒火，王牌球星朗拿甸奴深陷入球荒，今仗想收復首回合輸0比1嘅失地，恐怕唔容易。國民體育會作客唔掂，相信會屯重兵加強防守，爭取力保領先優勢至完場，今場屬於開細格局。

（周五早上6時15分開賽）

明尼路上屆自由盃勇奪冠軍，進攻鐵三角朗拿甸奴、祖奧、迪亞高泰達利居功至偉，但三人今屆演出嚴重跌Watt，迪亞高泰達利踢到依家更加係未開齋，細哨亦腳風唔順，至今只係射入一球12碼。鋒線死火之下，明尼路近六場比賽只入兩球，近八仗亦僅一勝，表現毫無霸氣。因此，球迷唔好奢望佢哋可以踢出水銀瀉地攻勢，於今場次回合賽事收復失地。唯一慶幸係明尼路防守仍然穩陣，客軍想偷雞都相當困難，Mic少估計佔主場之利嘅明尼路就算贏，好可能只係小勝收場。
國民體育會想頂到尾

嚟自哥倫比亞嘅國民體育會實力唔算標青，首回合戰至補時先至入波擊敗明尼路，唔多唔少帶有幸運成分。呢支哥倫比亞球隊喺分組賽作客另一支巴西球隊甘美奧，最終淨吞三蛋而回。吸取教訓之後，相信今次再去巴西比賽，應該唔敢再輕舉妄動，免招大敗，預料會以穩守突擊應戰，博守和對手晉級，已經完成任務，信國民體育會作客頂得住，一於要入球細。