阿仙奴剪布主場謝幕

猪拉多纳

今晚英超早場阿仙奴坐鎮主場迎戰西布朗，兵工廠每逢季尾便自動進入「前四模式」狂飆，撞啱西布朗幾近上岸，唔會阻人發達，阿仙奴定必喺呢仗今季主場謝幕戰大勝一場回報粉絲，斯維建議直取讓球主勝。

（now 621周日晚8時30分直播）

阿仙奴近幾年每季情況猶如倒模，先喺2、3月跌Watt，幾條戰線崩潰爭標無望，去到4、5月傷疲盡起，便集中火力開行Turbo爭前四，最終藉住競爭對手失分而搶到歐聯參賽資格，今季其實大同小異，唯一唔同係佢哋仲有機會爭足總盃。

西布朗上仗擊敗韋斯咸後排15，同護級區拉開4分接近上岸，仲比榜尾嘅卡迪夫城、富咸及諾域治打少一場，隨時三弱失分已令佢哋護級成功，今晚去到近6次作客輸咗5次嘅酋長球場，西布朗慳番啖氣周中砌護級對手新特蘭好過喇。相反阿仙奴只要贏多一場，就唔使理愛華頓踢成點都穩奪來屆歐聯入場券，加上呢仗係今季主場煞科戰，「廠仔」一定想贏得好好睇睇氹球迷，以佢哋聯賽三連勝咁勁嘅勢頭贏兩粒冇難度，讓球主勝捧得過。