獅吼西流爆細紀之戰

猪拉多纳

踢咗全季139場波，澳職今日終於殺入終極一戰，就係由布里斯班獅吼主場鬥西悉尼流浪者。由常規賽一二哥對戰，絕對係實至名歸嘅大戰。雖然獅吼實力強又有主場之利，但妹頭又想小野伸二離開西流前有個完美結局，所以好難表態支持邊隊，但相信雙方喺一場過決勝負嘅波實會打得比較拘謹，所以揀入球細最正路。

（有線64台周日下午2時直播）

獅吼除咗上季踢到甩晒轆早早出局外，其實再對上兩季都殺入總決賽，經驗相當豐富，而西流上季首季加入澳職即殺入總決賽，可惜決賽一役踢得太緊張，全場受制中岸水手最終屈居亞軍。不過，西流喺上一輪輕鬆踢水手出局，報回上季一戰之仇，證明班波已經夠成熟。
預計雙方傾向保守

縱使如此，西流大戰前夕卻傳出不利消息，陣中核心馬克布歷治或因足踝傷繼續避戰，點都會影響進攻火力，仲要面對住獅吼主場強勢，相信普波域會指導西流踢法先求保守。事實上，西流亦係全澳職開得最多入球細嘅球隊，超過6成賽事只得兩球或以下交收。
決賽場合入波唔會多

今季雙方對賽3次，獅吼贏過一場，但其餘兩場都只係各一打和兼開細。雖然雙方聯賽積分有差距，但嚟到一場過決賽場合，呢啲數據參考價值已不高，總冠軍獎座勝負難料，妹頭只能預期呢場緊湊而入波唔多嘅賽事，記得下午一齊睇球彩台直播見證總冠軍誕生啦！
妹頭推介

布里斯班獅吼Vs西悉尼流浪者

細