紅軍盡數大逼宮

猪拉多纳

為創奇迹 執多一粒得一粒

隨住曼城擊敗愛華頓，利物浦離英超冠軍又遠一步，要寄望奇迹出現先至有望奪標。不過「打不死精神」正正係紅軍嘅傳統，科娜深信班球員未到最後一刻都唔會放棄，依家紅軍同曼城得失球差係9球，因此今場作客已護級成功、戰意鬆懈嘅水晶宮，除誓取3分外，更會盡人事狂攻對手，執球一粒得一球，大盤值得捧！

（now 621周二凌晨3時直播）
未放棄爭標 奮戰到底

利物浦上場輸咗畀車路士，「神奇隊長」謝拉特嘅世紀一跣，不但跣走3分，更好大機會跣走埋個冠軍，賽後除咗有人認為謝拉特係輸波罪人之外，亦有人話領隊羅渣士需要負上責任，因為紅軍呢場只要打和同贏埋最後兩場就可以封王，但羅帥仍堅持主攻踢法，最終埋下輸波伏線。

「We win, we draw, we lose together」，科娜今周聽利迷講得最多就係呢句說話，一條心撐紅軍嘅利迷喺呢場波冇怪任何人，謝拉特跣腳只係一個意外，而羅渣士亦只係堅持自己嘅原則，之前聯賽11連勝都係咁踢，冇理由嚟到呢場就玩死守求1分，咁樣做只會打窒自己道氣。依家紅軍背後仍有一班迷絲強大支持，而紅軍從來唔係一隊會輕易放棄嘅球隊，即使喺得失球差落後曼城9球，要追番嘅機會實在渺茫，佢哋仍會放手一搏，今場對水晶宮繼續採取主攻，為一絲希望而奮鬥下去！
水晶宮上岸 無欲無求

水晶宮5連勝斷纜，上賽主場不敵同樣為爭標搏晒命嘅曼城，今場又要再對利物浦，都真係幾難踢，雖然領隊佩尼斯話球隊即使護級成功都唔會放軟手腳，會盡力踢好餘下賽事，但始終嚟到季尾最後兩場，球隊上咗岸冇嘢好爭，班球員喺心態上點都會有少少鬆懈，如果太早被紅軍攻陷，真氣一洩下隨時大敗一場，今仗捧大盤最正路。