紅軍絕地喪攻血洗水晶宮！

猪拉多纳

英超爭霸 最後直路

「謝四」領軍血洗水晶宮！利物浦喺今晚英超獨腳戲作客水晶宮，雖然佢哋上仗輸畀車路士，因得失球不及曼城而失落爭標主導權，不過小妹深信即將續約嘅謝拉特同佢班隊友，都唔會因為咁而洩氣，尤其係1989年英格蘭頂級聯賽，呢支當時嘅英甲班霸曾經喺主場以9:0屠殺水晶宮，雖然話要重演咁誇張嘅比數係冇乜可能，但「紅軍」肯定想省多幾粒拉番近個得失球差，1.87倍「讓客」一定要捧！

（now621台周二凌晨3:00直播）
謝拉特獲紅軍開2年新約

「神奇隊長」謝拉特今季喺利物浦爭標路上面，扮演一個非常關鍵嘅角色，可惜上仗對車路士一次「世紀跣腳」，隨時將隻獎盃跣走埋，但諗番轉頭，唔果唔係佢多次射入致勝球，「紅軍」根本連爭標夢都冇得發！領隊羅渣士早前就透露，即將年屆34歲嘅謝拉特會獲球會開出新約，最少踢到2016年，意味住「謝四」9成9會喺利記踢到掛靴，為贖罪好、回報球會又好，謝拉特都冇理由唔搏盡啦！

雖然曼城嘅得失球足足多利物浦9球，但未到最後都未知鹿死誰手，「紅軍」喺剩低兩場嘅重任，當然係贏波兼盡量爭取更多入球啦！利物浦前線有蘇亞雷斯壓陣兼有史杜列治復出，加上弗爆嘅史達寧及決心「補鑊」嘅謝拉特，火力當然不成問題，佢哋曾經喺25年前，主場以9:0大炒水晶宮，今次一於照辦煮碗，炒多鑊甘嘅畀水晶宮歎啦！
水晶宮上岸 冇必要搏命

水晶宮狀態的確唔曳，最近6場波贏咗5場，當中仲有4場波係零失球添，但睇番佢哋「零封」嘅對手，其實係「大巴車仔」、卡迪夫城同維拉呢啲防守型球隊，一旦面對曼城同愛華頓呢啲猛火勁旅，就坐底失兩粒，證明防守唔係想像中咁穩陣，況且佢哋都已經上咗岸，根本冇必要搏命，今鋪對住「紅軍」，睇怕都要抬蛋喇。
Data King：蘇神入波多過水晶宮全隊

蘇亞雷斯今季喺英超攻入30球，仲多過水晶宮全隊加埋嘅得球（28球）。

利物浦係今季英超作客王，18戰豪取10勝4和4負。

佩尼斯接手水晶宮後，喺11場先落後嘅聯賽入面，最終只得2分。
乜都玩錦囊：水晶宮反擊博「大」霧

「紅軍」為爭標已無退路，今場肯定一開波就喪攻水晶宮，不過主隊火力唔算話好差嗰隻，最近6戰都有5次有波入，主力射手賓捷安有一定質素，狀態又唔曳，隨時吼住利物浦空群出擊偷雞搵食，今場波9成開入球騷，1.52倍入球大熱都要捧。