「古城之戰」恒大辣手摧「花」

猪拉多纳

亞冠盃16強今日開打！上屆冠軍廣州恒大（足智彩譯FC廣州）首回合先作客長居陸上競技場，挑戰有烏拉圭名將科蘭押陣嘅大阪櫻花，呢場中日「古城之戰」完全係場火力嘅較量，人腳平均啲嘅恒大可以秤先。

（now671台周二晚6:00直播）
櫻花防守力曳

一如既往，恒大今場都出咗款宣傳海報，主題係「古城之戰，乘鋒破浪」，突出係靠晒穆里奇、艾傑臣兩件鋒將搵食。但呢張海報最大特點，在於用咗兩個城市嘅古稱，其中楚庭（又稱楚亭）據講係廣州最早嘅叫法，遠到响周朝時候已經出現。至於浪速就係大阪古代嘅名，不過有樣嘢大家未必會留意到，就係中日甲午戰爭入面，日本有艘巡洋艦就叫浪速丸，今場難免令人聞到有陣火藥味。

其實球場係英雄地，落到場冇人想輸，有火藥味唔出奇。事關恒大、櫻花都以鋒力強悍稱著，當中恒大近8場波只輸過1場，其餘7場贏晒，仲入咗23球咁多，平均每場有2.8球進帳，認真唔簡單。尤其季初一直好沉嘅穆里奇，呢輪開始復甦，配合埋迪亞文迪、郜林呢啲射得之人，攻擊力喺亞洲絕對可以講係一流。

櫻花都唔嘢小，科蘭呢件「大人物」係人都識，日本新星杮谷曜一朗亦有一定斤両，佢响上場日職對鯨魚仲打破11場入球荒，對恒大後防會有威脅。但係櫻花最大毛病係後防曳，近8場波失咗13球，場場都保持唔到清白之身，點頂得住恒大班強鋒呀？今場博1.95倍客勝啦。