哥一個睇嘅唔係波 係浪漫

猪拉多纳

睇波，其實係一件好私人嘅事。有得揀，我會選擇自己留喺屋企，享受一個人的浪漫。

大家成日以為一班人出去最正最熱鬧，係，三五知己嘻嘻哈哈，吹水飲酒剝花生，加上身處「中立場」，睇完拍拍屁股就走，乾手淨腳。不過，酒吧，主角係酒，K房，唱歌為主，有時候，足球反而淪為配角，有人飲到醉醺醺，有人顧住傾偈唱歌，未必個個一心想睇波，當你望住電視畫面，四圍嘈到拆天，邊可以真正享受到睇波樂趣？
作客冇得大叫

「作客」去老友度又點呀？小弟有童年陰影，99年歐聯決賽，成班去其中一個同學屋企捧紅魔，當年補時奇迹入兩球反勝，話之你夜闌人靜，梗係照樣狂呼大叫啦，擾人清夢當然捱鬧，成班人咩癮都無晒喇。依家人大咗，要湊夠腳凌晨組團睇波，難哉，仲要搵個容納一大班人嘅蝸居，更難矣。
女伴想一齊 我是拒絕的

計我話，一條友「主場」觀戰最好。真正想睇波嘅人，不需吃喝玩樂，唔使人陪，黐住個電視就夠，遇到大戰時，腎上腺素急升，緊張到心跳加速手心出汗，邊得閒理其他嘅嘢，或者我有職業病啩，睇波時更加唔想講嘢，齋聽住現場聲已經好正。喺屋企睇邊場可以自己話事，小弟亦好鍾意「撳嚟撳去」，一個人想點就點，遇上悶到嘔嘅比賽，在家千日好呀，一熄電視就瞓。好多女仔經常陪男友或老公睇波，我就覺得勉強無幸福，就算另一半想一齊睇，亦想Say no，無女友或老婆陪住好呀，樂得清靜嘛。

我很宅，但我很愛足球，睇波一班定單拖？你懂的。