川崎前鋒上盤首選

猪拉多纳

主場精銳盡出夠惡氣

亞冠盃16強首回合今日上演日韓對決，日職球隊川崎前鋒喺主場迎戰上屆亞軍球隊南韓嘅FC首爾。前鋒近期狀態唔錯，加上喺主場已多仗不敗，面對客場表現欠穩嘅FC首爾，有力先拔頭籌，小讓平半捧上盤。

（now 671周三晚6時直播）

前鋒喺分組賽以4勝2負嘅成績晉級，球隊分組賽三場主場賽事錄得全勝，當中包括擊敗另一南韓球隊蔚山現代，可見前鋒喺自己地頭出擊甚具惡氣。
首爾陣容變動大

前鋒近期狀態唔錯，上仗聯賽主場對甲府風林雖收起隊長中村憲剛同中場稻本潤一，但仍能輕鬆擊敗甲府風林，兩人如無意外會叉足電喺今仗復出，配合射手大久保嘉人、小林悠及雲拿天奴等攻擊主力，絕對有力攻破FC首爾大門。

FC首爾分組賽以首名出線，但表現其實唔算突出，球隊開季前有射手丹恩奴域轉投FC江蘇、隊長河大成轉會FC北京，以及後衞艾迪臣結束球員生涯，對班波有一定程度嘅影響。FC首爾分組賽作客只係贏過澳職球隊中岸水手，而且仲要靠對手「擺烏龍」先可以奏凱；面對另一支日職球隊廣島三箭都要輸波而回，可見作客表現平平，今仗縱有曾踢過浦和紅鑽嘅日籍射手艾斯古迪路在陣，亦難以喺客場全身而退，前鋒主場小讓平半非常值博，今仗一於捧上盤。