QPR阻頭阻細

猪拉多纳

鐵桶陣唔畀韋根發圍

韋根同昆士柏流浪（QPR）呢兩支上季英超降班分子真係冤家路窄，嚟到英冠升班附加賽都要碰頭一齊爭上英超，今場首回合先由韋根主場迎戰QPR，預料兩軍都唔敢輕舉妄動，守強於攻嘅QPR更會以守為先，費事今場輸得多搞到下場返到主場冇任何翻身機會，科娜今場熱捧入球細！

（TVB 302周六凌晨2時45分直播）

韋根季初喺積分榜排喺下游位置，令人擔心佢有降班危機，但喺上年十二月初搵嚟德國籍教頭路斯拿頂替奧雲高尼後，韋根即刻強勢反彈，用半季嘅時間就成功升上第五位，有跟開呢隊波嘅球迷相信都搵唔少！雖然韋根喺路斯拿帶領下攻力唔曳，不過佢並唔係一位完全奉行主攻踢法嘅教頭，會因應對手而用唔同戰術，佢會喺重要賽事玩龜縮防守打反擊，例如英足盃就試過用呢招砌低水晶宮、卡迪夫城同曼城三支英超分子，呢場升班附加賽嘅重要性甚至高過英足盃，韋根即使主場都唔敢亂嚟，費事攻得太犀利畀QPR偷到雞。
夏利叔教慣穩陣波

韋根有路斯拿呢位有料少帥，QPR都有位經驗老到嘅名帥夏利列納，夏利叔作風謹慎，戰術保守，令QPR曾經喺季初試過連續十一場開細，慣性贏1比0就收工，結果搞到隊波唔識入波，踏入2014年開始加強攻力反而搞到防守轉差，兩頭唔到岸，結果狂失分，未能直接升班。今場首回合夏利叔應該會「食番老本行」，先要求球隊做好防守，佢深明「唔輸當贏」嘅道理，今場作客最緊要唔好輸波，下回合返回主場擊敗韋根出線都唔遲，細盤捧得過。