諾域治主場盲搶 多數係咁仙

猪拉多纳

諾域治喺英超煞科戰前排第18位，落後第17位嘅西布朗3分且得失球差相距17球，數字上仍有機會但其實等如零，但佢哋話明今仗開仍會主動搶攻，務求盡快入波。可惜「金絲雀」今仗對手係阿仙奴，就算留力都唔會「Hea」到畀你數，太過主動搶攻隨時畀「兵工廠」反擊得手，令阿仙奴贏波謝幕！

（now 624周日晚10時直播）
冇可能炒兵工廠17球

諾域治今仗如果能大炒阿仙奴17球或以上，就有機會逃出生天，不過球迷們自然都知呢個係「不可能任務」。諾域治實力根本不及兵工廠，主動搶攻反而可能衰多二錢。阿仙奴4連勝狀態弗爆，主帥雲格日前表示下季仍會留隊執教，加上部分球員早前與球會續約，對士氣有正面影響。而且距離足總盃決賽仲有成個禮拜，阿仙奴今仗冇留力必要，更可乘機寓賽於操，對住「盲搶」嘅諾域治可藉反擊取勝，今仗一於捧阿仙奴贏波。
西布朗難頂史篤城

同日西布朗主場對史篤城，西布朗領先諾域治3分同17個淨勝球，其實可以話係護級成功，加上主帥梅爾仍未知下季能否領軍，一眾球員作戰心態自然有所鬆懈，未必讓得起硬淨嘅史篤城，捧讓球客勝。

（now 635周日晚10時直播）