衞冕露曙光 巴塞細擒艾爾切

猪拉多纳

重燃衞冕希望嘅巴塞隆拿今晚將作客弱旅艾爾切。巴塞悍將佩奧爾嚟緊周中宣布掛靴，球隊上下都想用獎盃歡送呢位鐵血隊長，不過艾爾切喺主場出擊後防分外硬淨，況且佢哋仍未上岸，必定施「守」術搶得一分得一分，巴塞要贏都唔易，大細中位數仲要調至3.5球，轉玩細盤更穩陣。（now 632周一凌晨1時直播）
谷埋呢段 獎盃歡送畀佩老大

現時聯賽剩番兩輪，巴塞落後榜首馬體會3分，由於下場雙方正面交鋒，即係話巴塞只要贏晒最後兩場，就可以後來居上成功衞冕，難得重現曙光「地上最強」定必搏埋最後一口氣。巴塞官方宣布，踢埋今季就離隊嘅忠臣佩奧爾，將會喺周四宣布掛靴，呢位鐵血隊長自99年升上一隊後，同巴塞共度15載風風雨雨，備受尊重，甚至有傳新帥大熱安歷基打算搵佢幫手做助教，因此眾將都希望用聯賽冠軍獎盃，為「佩老大」嘅足球生涯畫上完美句號，戰意唔使懷疑。

話雖如此，但艾爾切亦非善男信女，一來佢哋只係距離護級安全線多4分，仍要為擺脫降班漩渦而搏甩髀，二來佢哋一向靠主場搵食，近九仗喺自己地頭出戰嘅聯賽未輸過之餘，更連續12場主場正式賽事開細，若以大細中位數3.5球嚟計，艾軍今季所有主場比賽全部開細盤，睇得出呢班波嘅防線硬淨到暈，隨時搞到巴塞老鼠拉龜頂盡小勝，今仗大細中位數亦調至3.5球，梗係捧入球細喇。