英超榜首25度易主 曼城衝線扑「錘」封王

猪拉多纳

最激、最癲英超今晚煞科！今季英超爭標形勢堪稱史上最激，「一哥」位置好似玩爭櫈仔咁，由阿仙奴、曼城、車路士同利物浦等輪流坐，「易主」次數係史上最多嘅25次。當中只係坐咗呢張「一哥櫈」15日嘅曼城，只要今晚唔輸畀韋斯咸就可以3年內第2度封王，亨格比利就認為「藍月亮」唔會求1分咁冇大志，喺近期着晒火嘅迪斯高孭飛下，就算讓到「-2」都有能力炒起風流波「錘仔幫」，捧1.88倍「讓主」。（now621台周日晚10:00直播）

今季英超開咧前唔少人睇好曼城，但估唔到爭標形勢咁激，計坐榜首日數嘅話，阿仙奴有128日最長，跟住係車路士（64日）同利物浦（59日），反而最被睇好嘅曼城到今日為止只坐咗15日（見上圖），如果佢哋今晚封王將係史上坐榜首日數最短嘅奪冠隊伍（見右表）。
得15日榜首藍月亮奪冠史上「最短」

依家曼城領先次席嘅利物浦2分，兼且得失球差有13球優勢，領隊比歷連尼賽前仲有好消息，今季有28球進帳嘅阿古路克服鼠蹊傷可以候命，但計狀態同腳風嘅話，點都係迪斯高最把炮。

呢位波斯尼亞「長人」近3仗喪入5球，周中對維拉亦梅開二度，預計前季煞科戰臨完場入波率領曼城封王嘅「阿Kun」會先任後備。雖然話「藍月亮」今鋪拎1分都掂，但右閘薩巴列達就話見過鬼怕黑：「呢場波我哋係求勝唔係求和，大家都記得前季昆士柏流浪畀我哋嘅教訓，全隊上下都唔想再咁驚險。」
盧卡斯Call舊隊友幫手大Sam撐謝四要搞寸Party

利物浦想後來居上奪冠，今晚除咗要砌低紐卡素外，仲更要望「錘仔幫」爆冷擊敗曼城，據紅軍防中盧卡斯爆料，佢同班隊友連日嚟Send爆訊息畀韋斯咸主將安祖卡路爾同達寧，希望呢兩位舊隊友幫幫手。韋斯咸領隊艾拿戴斯亦一心想搞寸曼城奪冠Party：「中立角度想利物浦封王，個人就希望謝拉特圓夢，我相信卡路爾會入波幫利物浦做嘢！」

雖然韋斯咸最終排名每跌一級，「衝線獎金」就唔見120萬鎊，但隨住上周擊敗熱刺確保上岸後，「大Sam」放咗班手足4日假，周中又舉行球會周年晚宴，「大Sam」話呢個時候已經激發唔起班球員戰意，計鬥心肯定唔及曼城。況且韋斯咸今季喺首循環同聯賽盃4強3鬥曼城都輸晒，總共失咗12球，今鋪想阻曼城難啲啦！
Data King：韋斯咸3鬥曼城輸1:12

‧韋斯咸今季3鬥曼城輸晒，「總比數」係1:12。

‧曼城近13次英超鬥韋斯咸錄9勝3和1負。

‧「藍月亮」係自09/10球季嘅車路士（103球），第2支英超單季入球破百球隊，今季聯賽場均攻入2.7球。
乜都玩錦囊：曼城想安落捧盃撐「主主」

曼城唔想再經歷前季煞科日嘅驚險奪冠過程，希望盡早解決韋斯咸安安落落捧盃，預期開波初段就會發動狂轟猛炸。「藍月亮」近5次主場恭候「錘仔幫」贏晒，當中有4次係由頭贏到尾，1.4倍「主主」趁熱食。