QPR誓斬韋根

猪拉多纳

次回合回師地獄主場

相隔三日，昆士柏流浪（QPR）又再同韋根喺英冠升班附加賽碰頭，次回合兩軍主客易地而戰，QPR優勢相當明顯，皆因佢哋主場威力強勁，既然首回合作客都可以同韋根悶和0比0，呢鋪喺自己地頭出擊仲唔壓住嚟砌？加上韋根作客表現飄忽，QPR讓平半抵玩，捧上盤！

(TVB 301周二凌晨2時45分直播)

首回合其實韋根同昆士柏流浪都踢得格外謹慎，上半場鮮有真正具威脅射門，換邊後韋根攻勢較多，不過對住擺「鐵桶陣」加強防守嘅QPR始終都係未能破網，再加上QPR有運，韋根前鋒麥克科東尼竟然離門8碼近射一飛沖天，錯失贏波黃金機會，令到QPR能夠全身而退，帶住不敗嘅戰果再戰次回合，真係要講句「好運好過好波」﹗
韋根近5作客僅1勝

QPR今場返到嚟主場作賽，為爭出線唔會再擺鐵桶陣，QPR主場戰績犀利，今季喺英冠只係輸過兩場主場賽事，近十二場主場只係輸過一場，韋根喺主場都贏唔到QPR，作客又點會輕易擊敗佢哋呀？韋根主帥路斯拿雖然口口聲聲話壓力喺QPR度，但其實次回合未能帶住領先優勢踢作客都咪話唔緊張，而且韋根作客又唔算勁，近五場作客僅得一勝，近六次對住QPR更係未贏過，冇壓力就假，都係捧QPR上盤為妙！