昆士柏流浪斬草除根

猪拉多纳

英冠升班附加賽4強首回合，韋根同昆士柏流浪摸和0:0，今晚次回合兩隊主客互換，輪到QPR坐鎮主場出擊，隊長曉爾賽前揚言要搶得英超席位，希望挽留主帥夏利列納，「夏利叔」呢名老江湖更加大玩心理戰，藉此挫對手銳氣，今場要斬草除「根」話咁易，吼實2.15倍主勝啱數。

（TVB301、廣東體育周二凌晨2:45直播）

喺英格蘭教波超過30年嘅夏利列納，比起幾年前至踏足英格蘭搵食嘅韋根少帥路斯拿，執教經驗真係贏幾十條街，「夏利叔」上場賽後受訪嘅對答仲相當「到肉」：「韋根嘅進攻好煞食，製造到唔少危險攻勢。」換句話講，即係暗諷對手點勁都咬唔入佢哋啫。被問到點睇次回合形勢嗰陣，「夏利叔」仲語帶雙關咁話：「佢哋今季作客嚟到踢得好好，雖則我哋最後贏1:0，但呢場真係勢均力敵。」
夏利叔暗寸韋根

或者夏利列納根本冇諗過玩心理戰，只不過係卡爾萬「諗多咗」，但點樣都好，QPR嘅主場威力確實唔嘢小，今季23戰僅輸2場，成績拍得住李斯特城同般尼兩支直接升班球隊。咪睇QPR首席射手查理柯士甸首回合搏足全場都冇貨交，實情呢名英格蘭高大前鋒係「主場殺手」，今季17個聯賽入波有12球都喺自己地頭取得，配合拉夫摩利臣同凱列特喺前線鋪橋搭路，相信唔難搵到入波。

另邊廂嘅韋根，祖迪高美斯同麥克科東尼首回合先後錯失黃金機會，教頭路斯拿賽後慨嘆球員喺禁區缺乏「殺手本能」，隨時動搖球員信心不特止，佢哋過往到訪洛夫度斯路球場都演出麻麻，最近4次對碰只得1和3負，對上嗰次贏波更係11年前嘅事，想爬返上英超掘金﹖睇怕都係明年請早！