奧連特猛火咪走「堡」

猪拉多纳

雖然英格蘭主流聯賽已經結束，不過部分球隊仲要為爭奪升班資格繼續搏命。今晚就有英甲升班附加賽4強次回合，由聯賽「三哥」奧連特主場迎戰第6位嘅彼德堡。奧連特上仗只係冇運先同對手打和1:1，今仗回師主場肯定想砌低對手一吐烏氣，讓平半直取1.88倍上盤。

（TVB301周三凌晨2:45直播）
彼德堡作客曳防線開窿

奧連特喺首回合賽事，雖然畀彼德堡射手艾桑巴朗加喺越位情況下先開紀錄，不過呢班波並冇氣餒，最終由中場奧度巴祖建功扳成平手。領隊薩拉迪賽後話：「贏唔到係有少少失望，但睇見班波做到咁多『餐士』出嚟，相信我哋返回主場應該可以交到好成績。」又難怪薩拉迪咁有信心嘅，佢哋近排主場火力強勁，3仗轟入8粒，最重要係入波唔係集中晒一對箭頭列斯比同戴夫穆尼身上，鋒將達拿爾、中場甸尼確斯亦幫到手，加埋後防大將古夫拔、馬菲奧賓特利復出，攻守兼備自然信得過。

雖然彼德堡領隊戴倫費格遜係前曼聯主帥費格遜囝囝，不過佢教波明顯冇老竇咁叻咯。呢位蘇格蘭主帥上仗賽後都承認對手表現較好，和波都算執番身彩，又話知道今場惡打，暗示會死守到尾，但係睇番佢哋近4場聯賽作客錄得1勝3敗失8球，仲邊有死守本錢先？