諾在其中:家家寶再下一城

不死鸟

 禮拜日沙田舉行十一場賽事，而當晚仲會越洋轉播響新加坡克蘭芝馬場舉行嘅KrisFlyer國際短途錦標同新航國際盃。早前小妹嘅朋友就發起組團去睇呢兩場大賽，前後幾日仲可以四圍行吓，而且已搵咗一位新加坡地膽齊齊玩。雖然行程好吸引，但小妹有賽馬節目在身，邊度可以分身呢﹖唯有叫班朋友玩得開心啲啦﹗

蓮華生輝愈戰愈勇

        去唔成新加坡，小妹都會留響香港睇直播，支持一下「蓮華生輝」同「創惑」兩匹港隊馬。事實上，呢兩場大賽都有唔少名駒角逐，其中短途錦標就有曾來港嘅「兼併目標」列陣，而當地亦有匹名氣好響嘅「火箭人」參戰，港隊馬能否佔到甜頭仲係未知之數。

        不過，小妺對「蓮華生輝」都有一定信心，今季復出之後表現愈嚟愈好，上仗終於響短途錦標打破悶局贏番場，雖然僅以鼻位壓倒「帝聖龍駒」，但已拋離「創惑」成三個馬位，證明短途實力在港依然數一數二。今次遠征新加坡，雖然面對唔少國際級對手，但排一檔相當好跑，只要走位暢順，以此駒嘅狀態同進度，話唔定可以為港爭光﹗

        講番周日本地賽事，繼續追捧列陣第十場二班千六米嘅「家家寶」，呢隻馬近五場取得三勝兩位，演出忠心準繩，今場繼續跑二班賽兼負磅唔重，計落絕對有再捷條件，排十一檔對呢匹跑法機動嘅馬影響不大，可作重心看待。