賓菲加1.65倍冠軍咪走雞

猪拉多纳

伊比利半島打吡撐飛鷹

歐霸盃決賽喺中立場意大利都靈嘅祖雲達斯球場上演「伊比利半島打吡」，西甲西維爾大戰葡超賓菲加，上季「三亞王」、綽號飛鷹嘅賓菲加化身「追債王」見盃就搶，已經袋咗聯賽及葡聯盃，成功擺脫二奶惡運，展現冠軍相。「四冠王」美夢來到第三關，當然要一鼓作氣擸埋佢，連本帶利攞番之前失去嘅一切。西維爾後勁不繼，季尾明顯趺Watt，阻唔到對手登基，簡單揀1.65倍賓菲加「冠軍」。

（有線61、64、201及203台周四凌晨2時45分直播）

賓菲加上季聯賽臨尾畀波圖反超前而飲恨，打入葡萄牙盃及歐霸盃決賽又功敗垂成，尤其係上屆歐霸盃決賽對車路士，佔上風都輸波，的確唔抵。不過經一事長一智，賓菲加今季兵力分配明顯有改善，令佢哋四線作戰亦應付自如，已率先奪得聯賽及葡聯盃冠軍，葡萄牙盃對手只係里奧艾維，捧盃機會高唱入雲，因此，歐霸盃成為賓菲加餘下最大挑戰，必定傾力一搏。
西維爾季尾走樣

雖然賓菲加兩位中場安素佩雷斯及伊度亞度沙維奧停賽，但後備兵源充裕，蘇利馬尼、菲臘杜歷錫都係獨當一面嘅球員，足以填補空缺。最重要係鋒線洛迪高利馬、洛迪高摩連奴當勇。值得一提，賓菲加四強淘汰祖雲達斯，今仗重返「福地」，起碼比對手熟悉環境，變相佔地利優勢。

西維爾四強次回合補時獲得作客入球，驚險踢走華倫西亞，表現欠缺說服力。呢支06及07年盟主人腳唔算強，好依賴克羅地亞國腳拿傑迪錫負責組織攻勢，拍埋賓菲加整體戰踢法，明顯比較輸蝕。球隊季尾演出走樣，近四仗僅一和三負，斷送下屆歐聯入場券，對士氣造成沉重打擊。

伊比利半島球壇，西班牙一向被捧為大哥，但今次由細佬葡萄牙球隊讓波，證明莊家都睇好賓菲加可以再下一城。