FC首爾主場添食

猪拉多纳

前鋒追落後焗攻牙煙

今日亞冠盃16強次回合焦點，南韓球隊FC首爾主場鬥日職代表川崎前鋒，上屆亞軍FC首爾首回合兩度落後下，補時反勝3比2，球員鬥志一流，同時亦再凸顯川崎前鋒防線不穩嘅老毛病仍然冇改善，今仗焗攻之下，後防勢必更空虛。FC首爾可趁機再下一城，主隊小讓平半，力捧上盤。

（now 670周三晚6時30分直播）

踢淘汰賽非常講究防守，事關先失波好有可能冇仇報。川崎前鋒一向擅攻不擅守，成為首回合失利嘅主因，仲要被對手取得3粒作客入球，所以現時晉級形勢甚為不妙，即使贏1比0、2比1，都會出局，惟有豁出去搶攻，博贏兩球或以上。不過去到南韓比賽，要達到呢個目標並唔容易，前鋒近兩次作客都食白果，進攻效率偏低，今屆踢咗7場亞冠盃，5場有失波，防守脆弱，今仗勉強壓前主攻，可能前面入埋唔夠後面輸。
艾斯古迪路「以日制日」

FC首爾雖然季前有射手丹恩奴域及隊長河大成離隊，但並冇影響演出，已歸化為日本籍嘅西班牙裔前鋒艾斯古迪路狀態大勇，首回合亦射破川崎前鋒大門。事實上，呢位25歲射手自小已經喺日本長大，出身於浦和紅鑽青年軍，亦有日職比賽經驗，熟晒川崎前鋒路數，今仗又有搵食機會。