廣島讓客睇住食

猪拉多纳

流浪者防守唔穩又焗攻

踢兩回合制淘汰賽最忌開壞個頭，就好似西悉尼流浪者咁，喺亞冠盃16強首回合作客廣島三箭，雖則有杜米祖歷取得作客入球，但就被廣島三度攻破大門，今日返到主場出戰次回合被迫焗攻，弊在防線主將杜普史丹利受傷避戰，隨時未有斬獲先告失守，捧受讓嘅廣島1.66倍「讓客」相信冇走雞。

（now671及672台周三下午5:30直播）

西悉尼係亞冠盃分組賽東亞區防守王，首回合一下子失夠3球，箇中原因同佢哋喺澳季後總決賽搏足百二分鐘輸波，導致球員體力過度消耗同士氣受挫有關。首回合敗局無法改變，難得將帥相當正面，箭頭杜米祖歷揚言踢全攻型足球博絕地反擊，主帥普波域仲話要複製之前季後賽2:0擊敗中岸水手嘅歷史，希望翻盤成功。可惜杜普史丹利呢支後防定海神針傷咗，今場好大機會陪埋前鋒馬克布歷治養傷睇波，惟有畀唔多夠班嘅比奧甘扼守中路，睇怕中場小野伸二呢場告別戰，都幾難用贏波同球迷道別。
三箭7場作客未輸過

至於廣島三箭為備戰今仗，監督森保一喺日前聯賽刻意收起首回合踢正選嘅柏好文、高萩洋次郎、山岸智等人，中場青山敏弘躋身日本世盃大軍後，亦會搏盡討好國家隊主帥沙哲朗尼，球員體力同鬥志毋須懷疑。再者，廣島三箭連同亞冠盃同日職賽事，最近7場作客2勝5和未輸過，今場面對焗攻但又防線不穩嘅西悉尼，隨時贏多場都唔奇，「讓客」值得捧場之外，不妨冷敲埋3倍客勝。