漢堡齊腳主勝格

猪拉多纳

射手拉蘇加復出數胡

德甲升/降班附加賽今晚上演首回合賽事，漢堡一直頂住嗰個半世紀「頂級招牌」面臨關鍵考驗，今晚同下周日會同德乙季軍格雷特霍夫爭呢個德甲席位。如果不幸要降班，將會打爛「德甲成立以來唯一未降班球隊」嘅金漆招牌。不過，佢哋今晚有主場之利，兼且有王牌射手拉蘇加復出，有望開出1.7倍主勝，先拔頭籌。

（有線61、64、201及203周五凌晨2:30直播）

漢堡今季成績唔掂，防守差係主要原因，佢哋一直靠「以攻為守」嘅方式去生存，所以自從22歲首席射手拉蘇加上月初受傷後，球隊就一直輸到開巷，上場煞科戰都唔例外。雖然輸波，不過有拉蘇加復出，佢仲即刻有波入，表現實在令球隊鼓舞。佢同查漢奴古、雲達華治組成嘅攻擊組合，實在唔應該喺德乙出現，以佢哋今季主場贏過利華古遜同多蒙特嘅戰績，今晚要贏格雷特霍夫唔難。
格軍作客贏波率低

格雷特霍夫上年走完德甲一趟後又落返德乙，不過今季喺乙組表現唔算突出，尤其作客比賽贏波率好低，近九場作客聯賽只係贏過兩場！最受注目嘅科索沃射手阿斯美有傳已經畀德甲球會睇中，就算球隊升唔到班都唔憂無得踢德甲。格雷特霍夫今季喺德國盃作客輸過畀漢堡0:1，相信難以復仇，一於捧漢堡主勝。
頂占筍盤：漢堡（主勝）