朗斯煞科搶韁吼半場勝

猪拉多纳

各地聯賽紛紛收咧，今晚輪到法乙進行煞科戰，其中CA巴斯蒂亞主場對朗斯值得留意。三哥朗斯升班席位仍未穩陣，遇上篤定降班嘅包尾大幡CA巴斯蒂亞，一定搶韁盡快鎖定勝局，半場客勝不容錯過。

（周六凌晨2時30分開賽）

CA巴斯蒂亞今季喺法乙被人見人蝦，從該隊落後尾二嘅伊斯特尼斯12分可見一斑，唔係睇佢近六仗主場未嘗一敗，同對手踢風流波不無關係，實在不能作準。法乙頭三位獲升班資格，朗斯雖排緊第三，但只係多第四嘅南錫兩分，只要今仗稍有差池，南錫可後上搶到升班席位，為免晚節不保，朗斯最穩陣嘅做法梗係砌低CA巴斯蒂亞，戰意唔使懷疑，之前佢哋試過作客大炒伊斯特尼斯六個一皮，證明對住護級分子有一手，不過客勝得1.38倍冇肉食，半場客勝有1.9倍，不妨博佢哋半場搞掂CA巴斯蒂亞衝上法甲。
拉瓦勒遇梅斯有雞偷

另外護級形勢非常緊湊，法乙最尾三隊要降班，尾四嘅拉瓦勒主場迎戰一哥梅斯，雖然拉瓦勒只係多尾三嘅查多魯一分，但今仗只要贏波，就毋須理會其他對手嘅賽果，便可成功護級，咁啱梅斯已經奪冠及升班資格，上仗又喺主場粉絲面前贏波謝幕，今仗戰意成疑，隨時做順水人情益拉瓦勒唔奇，直取主勝。至於已宣布降班嘅伊斯特尼斯作客昂熱，伊軍季尾為搶分豁出去進攻，可惜後防猶如豆腐渣一篤即散，昂熱近期無欲無求下入得又失得，兩軍今仗冇晒心理壓力對攻都似，大盤咪錯過。