費列活特弗爆再下一城

猪拉多纳

今晚英乙升班附加賽有場獨腳戲，由費列活特喺4強次回合主場對約克城。費列活特喺首回合小勝1:0，依家手握出線主動權，今晚大有條件睇住對手嚟食，一於捧佢哋再下一城，讓平半下梗係捧1.75倍上盤。

（TVB301周六凌晨2:45直播）

首回合費列活特憑住翼鋒馬迪列巴亞倒戈入波贏1:0，取得領先優勢之餘，仲成功打斷對方17場比賽不敗氣勢。依家費列活特班波士氣高漲，已經做好準備殺入決賽，翼鋒馬迪列巴亞仲揚言再射入前東家添。事實上班波狀態唔差，近5場贏3場，主力中場沙斯域上仗表現同樣Sharp醒，無論交波定埋門都充滿威脅，只要可以保持到上場水準，想再添食相信唔難。
約克城首席射手養傷

對手約克城首回合唔係冇機會，奈何前線把握力的確差咗啲。佢哋喺季尾發力狂追，幾經辛苦先攞到附加賽入場券，點知喺首戰即慘吃悶棍，對士氣打擊極大，今晚仲要作客焗攻對手，加上首席射手韋斯費查未有復出消息，睇怕都係凶多吉少。