馬偉昌有着落

猪拉多纳

　　目前韋達與潘頓爭崩頭，前者上期復出掃走3W，後者贏兩場，十場賽事有半數頭馬被二人瓜分。呢段日子，真係幾難「飛」起二人坐騎唔買。

　　暫時排在騎師榜第五位嘅馬偉昌，成績比上不足，比下有餘，冇咩好爭，頭馬數字卻唔少，有33場，雖說有時出馬不多，又不代表該期賽事冇着落，好似前一期，成晚跑得兩匹馬，便有「綻放美麗」由頭帶到尾。

　　今期八場谷戰，馬偉昌出馬3匹，其中已有兩匹係機會馬，俱排有利檔位，C欄1及3檔，已經係成功第一步。阿昌尾兩場賽坐騎來自大摩馬房，先講第七場「新力飛」，演出唔到我哋唔服，今季係都唔會連續兩場跑得好，硬係一啖砂糖、一啖屎，既然上場田泥1200米跑輸咗，今場回師贏馬路程谷草1200米，又會輪到。

　　第八場「龍騰虎震」上場跑谷草一哩發揮唔多好，賽後賴維銘畀人話，所以，表現有點遠離真實，唔使介意。今場排好位、換上大摩愛將，隻馬亦有足夠日子回氣，隨時再現虎相。Jack