東韋攜手稱雄

猪拉多纳

　　告東尼大徒弟蔡明紹停賽之中，但佢冇一下子掟晒啲馬畀新徒弟吳嘉晉，寧願向外招手，韋達自必然係其中1位，呢期二人有兩匹合作馬，分別在第五、七場，機會唔係冇。

　　今季韋達與告東尼暫時合作成績美滿，次數雖然唔多，跑咗大半季，10隻都唔夠，勝在交得準，9駒累積1冠3亞2季，呢pair從前賓主，近季間唔中有合作，一直維持到唔錯成績，總之，如果你跟買，未必可以帶挈發達，肯定唔會隻隻冇着落，點都有份中吓。

　　列陣第五場五班泥地一哩「壯烈雄心」，3場之前，咁大個仔第1次跑此程，結果由頭帶到尾，強如「金威勝」都追佢唔到，隔1場再於泥地1800米放入亞軍，再次顯示出自己在泥地真係搵到食，今場跑勝途一哩，梗有把炮。

　　至於，第七場四班1200米草地「奀皮仔」，近幾場之中，係得杜滿萊跑錯嗰場大敗，今季其餘賽事表現好穩定，絕少輸得好難睇。經過上次轉泥又撞板之後，告仔接受現實，安排跑番贏馬路程，並且唔用細路仔，搵個韁繩好嘅騎師，擺明有計。（Jack）