勁飛翔復甦贏面大

猪拉多纳

　　第七場三班1650米，全晚唯一唔滿額的賽事，只有11駒角逐，不過當中除「活力小子」外，其餘10駒於同程唔係贏過馬就曾上名，路程均有根有據，形勢相當緊湊；比較上，同程曾四W的「勁飛翔」應可睇高一線。

　　「勁飛翔」今季跑過五場均於谷草一哩，共獲一冠兩亞一第五，表現準繩，不過自上場一月初入Q後，已有四個月未見出賽，當然，健康上必然有過問題，事實確曾缺課一段時期，但很快已經回復正常；上月尾一課田草1600米大閘，於潘頓胯下走來輕鬆，得第二只不敵剛勝出皇太后盃之「格哥兒」，可見狀態有水準。今鋪養精蓄銳等強項谷草一哩上陣，勝望甚大。「聰明波」靠快放搵食，今場前領馬少加上排三檔，隨時一放到底。

　　另外，第三場四班1650米，「光速銀桂」剛於上周三同程跑第三，表現算不俗，今匆匆再戰合乎馬房一貫搏殺手法，續配潘頓必求補中。「綻放美麗」上仗僅負於今季大勇之「勝算高」，實屬非戰之罪，莫雷拉停賽換上韋達無損戰鬥力，仍是前列分子。（向東）