馬體會細不可當

猪拉多纳

和波就封王 唔怕作客巴塞

今季西甲冠軍爭持超激烈，今晚煞科戰二哥巴塞隆拿主場硬撼榜首嘅「床單兵團」馬德里體育會，名副其實上演爭冠決賽。衞冕嘅巴塞要後上捧盃非勝不可，壓力極大，何況近期班波谷極都谷唔起，相反馬體會只要和波即封王，今季五戰「地上最強」未嘗一敗，咁蹺全部開入球細，作客去到魯營一定穩陣行先，轉玩細盤更佳。

先講吓現時聯賽形勢，今輪係煞科日，榜首嘅馬體會領先巴塞3分，由於西甲同分先計對賽，而首循環互交白卷，只要巴塞今仗擊敗馬體會擸晒3分，便在同分之下憑較佳對賽成績反壓對手，後來居上蟬聯冠軍，以「地上最強」咁豐富嘅爭冠經驗兼有地利，被視為奪冠大熱唔出奇。
美斯決戰前年薪2.1億續約

斯維唔會懷疑巴塞嘅爭勝決心，不過連續兩輪遭護級分子艾爾切及基達菲逼和，睇得出美斯在內嘅球星非常搏命，可惜唔順起上嚟總係差啲差啲，雖然巴塞賽前剛宣布同美斯達成續約協議，有傳年薪達2,000萬歐元（約2.1億港元），超過死敵C朗，成為足球壇打工皇帝，但佢哋道氣已洩，唔係想贏就一定贏到喎。

馬體會整季表現極之穩定，全賴穩如泰山嘅防守，上仗賽和馬拉加與中堅高甸停賽有關，今仗呢位烏拉圭鐵衞刑滿復出，令「床單兵團」防線固若金湯，與巴塞非勝不可相比，馬體會只需打和便可一搔18年之癢再嘗冠軍滋味，飢渴感更強，上仗因傷倦勤嘅箭頭迪亞高哥斯達康復進度良好，大有機會喺呢場「決賽」落場搏殺，多埋呢位防守型中鋒壓陣，效果更佳。

況且馬體會體力化勇悍球風，擅於打亂對手節奏，難怪今季喺西超盃、聯賽及歐聯五度與巴塞交手，共取得一勝四和不敗佳績，咁蹺全部都開入球細，證明佢哋能夠搞到顧住搓搓搓嘅巴塞老鼠拉龜，「決賽」場合一定踢得更小心謹慎，唔慌多波入，細盤有1.82倍非常值博。