阿仙奴細成騎虎

猪拉多纳

8年無冠重壓 唔敢谷太上

阿仙奴主場對「老虎」侯城呢場英足盃決賽戲碼原本就唔算強，亦都唔係咁吸引，不過由於「兵工廠」已經8年無冠，畀球迷強烈恥笑為「白果廠」，今場無論係「廠迷」定其他球迷，都想睇吓阿仙奴究竟會係成功打破錦標荒，定係創下9年無冠嘅尷尬紀錄，無論贏定輸都係話題十足！依家阿仙奴上上下下都恨捧盃恨到發燒，不過太想捧盃反而會有反效果，呢班冇乜大賽經驗「槍手」好難唔緊張，發揮一定冇咁好，至於「老虎」侯城亦都唔蠢得晒，自知技不如人，應會踢穩守突擊，阿仙奴想攻都唔係咁易攻得入，細盤值得一捧。

（now 621及631周日凌晨零時直播）

近年英足盃決賽戲碼多數都係強弱對碰，例如09-10年車路士對樸茨茅夫、10-11年曼城對史篤城，以及上季韋根喺溫布萊球場以1比0爆冷擊敗曼城，今季就輪到阿仙奴對侯城，不過既然韋根都贏到曼城，咁就真係好難擔保侯城擊敗唔到阿仙奴。係人都知呢個盃對近年處於黑暗日子嘅阿仙奴有幾重要，要靠捧起呢隻盃嚟避免9年無冠，雲格同球員均希望一嘗冠軍滋味，為球會、為自己、為一直不離不棄嘅「廠迷」捧盃挽面子！講到呢隻盃咁重要，正常人都會覺得緊張喇，更何況係出名心理質素差嘅「槍手」？呢班「槍手」冇乜決賽經驗，愈係對英足盃重視，往往就會愈緊張，比賽嗰陣就更加會綁手綁腳，發揮唔到正常水準，而且「兵工廠」唔係冇試過喺決賽失敗收場，11年英聯盃決賽爆冷輸畀伯明翰，前車可鑑，班球員可能唔敢谷得太上，費事入唔到而輸番轉頭。
侯城大巴陣玩死守

「老虎」侯城有自知之明，嚟到決賽知道自己處於下風，仲咁死蠢同出名進攻勁嘅阿仙奴鬥攻咩？梗係喺龍門前「泊大巴」玩死守，磨到對手冇晒符，打突擊博爆冷喇﹗況且阿仙奴唔識破「大巴陣」，面對弱旅嘅死守戰術往往都係老鼠拉龜，要撕開侯城條防線真係唔易，捧細喇！